معدن الخال

من لا حسب قبل النسب معدن الخال

لا ينشد المولود من وين عيبه

من اهمل التدقيق في ساس الاجيال

يجني حصاد الخايبة والغليبة

الساس مبنى والقيم سور وظلال

وبيت بلا ساس رياحه تجيبه

والبغل لو ترقى به طويق وجبال

ما يسبق الخيل الاصيل المهيبة

العرق دساس وله صولة وجال

في مركز الجينات ياخذ نصيبه

اسم الخال ما يدرج بكرت الاحوال

لكن طبوعه بالولد تدعي به

يقرا من النظرة ومن صمت الاقوال

وتشوف طبع الخال في حزة الريبة

حتى ولو عنتر رقى كل ما طال

عيب النسب خلى حياته صعيبة

يرد القنا ومطوع كل خيال

لكن سواد العرق عيا يسيبه

يا طالب الناموس حذراك تنمال

للمعدن المغشوش وتظن طيبه

طبق نظام الفحص في كل الاحوال

تسلم من اخطاء الزمان وعيبه