طناب العز

يا زارعٍ من شهقة الريح غابة ترجي الجنى والغرس في كفّ حطّاب!

تأمن سكون الموج ترجي رحابة وأثر الظمأ مدفون في جوف لكواب

تسأل تقول الجرح وشلون بابه؟ وشلون يرميني سهم قوس لقراب؟

هاك الجواب اللي ثقيلٍ حسابه يغنيك عن قولة غدى الوقت غلّاب

أقسى طعون الوقت وأدهى صوابه لا طاح سقفٍ كان للرأس محراب!

وإليا انهدم مبنى الثقة والمهابة وش عاد ترجي من تهاويل الأسباب؟

تلقى الوفا يلفظ بقايا شبابه بين الخناجر وابتسامات الأغراب

فاحكم قفول الصدر واقطع ركابه واضرب طناب العز في راس مرقاب